Asteak joan, asteak etorri… hemen daukazu azken Goienerberria, berritasun eta informazio ugariz kargaturik! Gozatu!
Goienerberriko albiste sortarekin hasi aurretik ohar bat ordutegiak baldintzaturiko 2.0DHA edo 2.1DHA tarifa bat kontrataturik duzuenontzako. Kontuan izan igandea, martxoak 28tik aurrera, udako ordutegian sartuko garenez, tarifen ordu tarteak ere aldatuko direla.
Igandetik aurrera:
— PUNTAKO TARTEA (garestia) 13.00etatik 23.00etara izango da (10 ordu), eta
— SAKONUNEKO TARTEA (merkea) 23.00etatik 13.00etara (14 ordu)
Sorkuntza taldean lanez gainezka daude eta bi lankide berriren bila jarraitzen duten bitartean, bestelako proiektu asko dituzte mahai gainean. Tartean, 2020. urtean bazkidetu zen Getariako Udalaren eraikin publikoen behar energetikoa eta autokontsumo elektrikoen bideragarritasuna aztertzea. Hortaz, Udalak kooperatibarekin egindako hitzarmenari esker, energia-eraginkortasuna sustatu eta energia berriztagarriak martxan jartzeko ikerketa bat abiatuko du.
Aski entzuna izango duzu seguruenik Orexako esperientzia, bertan udalak eta herritarrek energia berriztagarrien alde egindako sekulako apustua. Goiener bidelagun izan dute proiektuko une askotan eta horregatik ekarri nahi izan dugu Euskadi Irratiko Ekosfera saioan Eneko Maioz alkateari egindako elkarrizketa. Orexan energiaren bueltan landu duten planteamendua benetan interesgarria da eta guztiz bat egiten du Goienerren proiektuarekin, zorionak Orexa!
Ekitaldiak beti online antolatzeaz nekatzen hasiak bagara ere, martxoko bigarren larunbatean beste Lantalde Topaketa bat antolatu genuen eta goiza elkarrekin gozatzeko aukera izan genuen, norberak bere pantailaren atzetik, noski. Oraingoan, Ekhilur kooperatibaren eskutik tokiko txaponaren inguruan sakontzeko aukera izan genuen; lehenbizi gaiaren inguruan jasotako hitzaldi batekin eta ostean, denon artean sortu zen eztabaida bidez.
Hitzordua galdu bazenuen edota oraindik Ekhilur ezagutzen ez baduzu, jarraian hainbat elkarrizketa aurkituko dituzu euren proiektua sakonago ezagutzeko. Eta noski, Telegram kanalean jarraitzen badituzu, informazio guztia momentuan jasotzeko aukera izango duzu. Animatu, ezagutu proiektua eta bazkidetu!
- Miguel Angel Gonzalez 97FM Irratiko Suelta la Olla saioan
- Artikulua Bizkaiko Hitzan: «Sistemaren barruan, berak baino hobeto jokatu behar duzu»
- Artikulua Europa Press-en: «Ekhilur ordainketa sistema berria abiatu dute»
Amaitzeko, Goienerrek parte hartu duen «Transizio Energetikoa» dokumentala ekarri dizugu. Hegoa institutuak ekoitzi duen dokumental honek biltzen ditu Euskal Herriko energia-trantsizioaren inguruko hainbat esperientzia eta tartean, Goienerrena. Kooperatibari buruzko atala ikusteko gogoz bazaude, hona hemen bideoa. Gozatu!
Merkaturtzailean ere aste oso mugituak bizi izan ditugu, ezin ukatu. Apirilaren 1ean indarrean sartu behar zuten tarifa berriak atzeratu dira eta azkenean ekainaren 1ean aurreikusten da indarrean sartzea. Data atzeratze hau ezagutu aurretik, martxan jarria genuen bazkideei komunikatzeko kanpainia guztia, ondorioz etxean jaso zenuten gutunean data zaharra azaltzen da. Beraz, argi izan, tarifa berriak indarrean sartzeko aurreikusitako data berria ekainaren 1a da.
Gure aldetik, prestatuta genituen komunikazio ekintzekin aurrera jarraitu dugu eta batzar informatiboak ere antolatu ditugu modu telematikoan izan badira ere. Tarifa berri hauen inguruko informazio guztia eta batzarrak online ikusteko aukera daukazu ondorengo esteketan: etxeko kontratuetakoan eta enpresentzakoan.
Azaroan, koronabirusaren eragina hazi zenean, aurrez aurreko arreta emateari utzi genion eta eskerrak eman nahi dizkizugu erabakiarekin ulerkor izateagatik. Orain, bazkideetatik gertuago egoteko nahiarekin, bulegoak arreta aurrez aurre emateko ireki ditugu, betiere aurretik hitzordua eskatuta. Gauzak horrela, bulegoa kokatua dagoen udalerriko intzidentzia tasa 100.000 biztanleko 250 kasutik jaisten bada, bulegoa zabalduko dugu arreta presentzialerako, hitzordua aurretik eskatuta noski (900 816 365 doako zenbakian). Gogoratu maskara derrigorrezkoa izango dela eta (ahal bada) pertsona bakarra etortzea komeni dela. Gure webgunean beti eguneratua izango dugu unean-unean zein bulego ditugun zabalik. Eta, gogoratu, telefonoz eta webgunearen bitartez ere kudeaketa gehienak egiteko aukera duzula!
Energia-Komunitateena azken aldian bolo bolo dabilen mintzagaia da eta Goienerren aspaldi dihardugu gai hau sakonki lantzen, arlo honetan ere gure ekarpena zabaltzeari ekin diogu. Azken asteetan komunikabide ezberdinetan iritzia emateko parada izateaz gain bina hitzaldi ere eman ditugu. Interesa izanez gero, hona hemen hemeroteka labur bat:
- Santi Ochoa de Eriberi Energías Renovables aldizkarian elkarrizketa
- Maria Arretxe Euskalerria Irratiko Irrintzi Plaza saioan
- Oier Etxebarriaren hitzaldia Seminarixoan (Bergara)
- Oier Etxebarria Txapa Irratiko Kolax saioan
- Artikulua Argian: «Goienerrek Energia-Komunitateak sustatzen jarraituko du, ingurumena errespetatuz eta gizartea ahaldunduz»
Azken hilabeteetan Goienerren lantzen ari garen Proiektu Europarrek erritmo bizia hartu dute eta bilera ezberdinak izan ditugu proiektu hauek zertan diren azaltzeko. Horretaz gainera bazkideak proiektuok ezagutzeko eta azken albisteen berri izateko, gure webgunean atal berri bat zabaldu dugu “Proiektu Europarrak” deiturikoa. Bisitatu eta ezagutu zertan gabiltzan Europa mailan!
Udaberria iritsi zaigun honetan online dendari kolore biziagoak jarri nahi izan dizkiogu: Sudaderak, kamisetak, “Energiak” monografikoa, katiluak, poltsak… denetarik aurkituko duzu gure dendan! Sartu, seguru gustuko zerbait topatuko duzula!
Amaitzeko, aspaldi egin gabeko langile kontaketa egin dugu eta dagoeneko 45 gara Goiener Taldeko langileak eta abian diren hautaketa prozesuetatik aurki etorriko diren berriak! Ezagutu familia polit hau zeinek osatzen dugun.
