Dagoeneko faltan botako zenuten GoienerBerria, apirila eta ia maiatza osoa ere airean pasa zaizkigu geldialdi bat egin gabe, aste hauetan zertan aritu garen erreparatzeko. Prestatu dugun laburpena zuen gustokoa izatea espero dugu.
Maiatzari Nafarkoopeko urteroko Batzarrarekin ekin genion, aurten ere ezinbestean telematikoki egin behar izan genuen. Urtea nola joan den ikusteko eta aurrera begira zertan arituko garen jakiteko egindako aurkezpenak, batez ere, Sorkuntza eta Administrazio taldeen eskutik joan ziren (Esplorazio eta Arreta taldeen laguntza ere izan zuten). Ondoren gai-zerrendako puntu guztiak bozkatu eta onartu genituen. Goiener Taldeko lankide berriei aurpegia eta ahotsa jartzeko aukera izan genuen gainera.
Baina Nafarkoopeko Batzarra prestatzeaz gain lanez mukuru dabiltza Sorkuntza eta Esplorazio taldeak, eta hala ere, ateratzen dute denbora hitzaldiak eta formakuntza saioak emateko. Nabarmentzekotan autokontsumo-kolektiboa eta batez ere energia komunitateen inguruan eskaini ditugun hitzaldiak: Bera, Hernani, Kanpezu, Leintz-Gatzaga, Larraul, Egia edota Urnietan. Izan ere, gaia pil-pilean dago eta etorkizuneko energia-komunitateetan ereduak daude jokoan, Oier Etxebarriak Euskadi Irratiko Ekosfera saioan ongi azaldu zuenez edo Erika Martinezek Konfekoop aldizkarian.
Eta noski, hitzaldiak emateaz gain proiektuak ere martxan jarri behar ditugu. Adibidez, Munitibar udalerriko pilotalekuko sarera konektatutako eguzki-planta fotovoltaiko hau.
Eta energia hezkuntza ere badenez, ikastetxeetan hainbat hitzaldi ematen ere ibili gara, tartean Gasteizko Corazonistas, Sagrado Corazón eta Vera Cruz ikastetxeetan eta baita Etxarri-Aranazko Andra Mari ikastolan ere. Azken honetan energia berriztagarrien ikasgaia bertatik bertara landuz, izan ere iaz Argi-Hezten ekimenaren barruan instalatutako autokontsumoko panelak baitituzte.
Ikastetxeez gain, bazkideentzako formazio saioak sarean ere antolatu izan ditugu. Tarifa berriei buruzkoa otsailean izan zen, baina orain, tarifa berriak indarrean sartzera doazen honetan (ekainaren 1ean), hemendik gogorarazi nahi dizkizuegu aldaketaren inguruan prestatutako web orria, bideoak eta ohiko postaz bidalitako gutuna. Horretaz gainera, jakin ekaina aurretik jasoko duzuela zuen hornidura puntuak jasango duen aldaketaren inguruko informazio orri pertsonalizatua.
Aipatu dugu aurrez gure explorazio taldea buru belarri ari dela lanean. Europako proiektuek erritmoa hartu dute, eta horietako bik zuzenean parte hartzeko aukera ematen dute:
Batetik, interesgarria iruditzen bazaizu Goienerrek etxeko berokuntzarako eta ur bero sanitariorako irtenbide berdea eskaintzea, eman zure iritzia BeeCoop proiektuko inkesta honetan eta lagundu zure egoera ezagutarazten. Bioenergiari inguruan orain asko ez badakizu ere, edo nahiz eta zuretzako egina ez dagoela iruditu, zure pertzepzioa garrantzitsua da proiekturako. Trantsizio ekologiko eta justu bat lortzeko bidean urratsak ematen lagunduko digu. Ekainaren 10ean bioenergiari buruzko hitzaldia emango du Yago Goitia lankideak. Gaian sakontzen hasteko aukera ona duzu.
Edo bestetik, agian, bolondres-talde bateko kide izan nahi duzu. Formakuntza jaso ondoren, energia-pobreziako kasuak antzematen esku bat bota dezakezu eta hauek arintzen lagunduko duten energia-eragile bihurtu zaitezke. Izena emateko epea ekainaren 11n bukatuko da. Powerpoor proiektua eta formazioekin lotutako guztia ezagutzeko, sartu hemen. Aitor Ossa gure lankdieari egindako elkarrizketa bat uzten dizuegu gaian sakontzeko.
Proiektuen garapenean, ohikoa izaten da inkesten bidez informazioa biltzea. Galdeketa puntualak jaso eta betetzeko prest dauden bazkideen bila gabiltza. Zure ekarpenarekin parte hartu nahi baduzu, inprimaki hau betetzea nahikoa da.
Gaia aldatuz, ekainaren 4an, 5ean eta 6an Bioterran izango gara. Oso pozik gaude azoketan berriro presentzialki parte hartzeko aukera dugulako. Zatozte, gure txoko berritua ezagutzera animatzen zaituztegu, eta nola ez, eskainiko ditugun bi hitzaldietara: Hidro-Ttipi proiektua (ostirala, ekainak 4, 17:00etan) eta tarifa elektriko berrien inguruan (igandea, ekainak 6, 11:00etan).
Eta ilusioz baita ere, esan nahi dizuegu gure Telegram kanalean 600 herpidedun baino gehiago garela dagoeneko. Astean behin laburtzen dugu bertan kooperatibaren egunerokotasuna zertan den; zuk ere egunean egon nahi baduzu, ez galdu aukera eta harpidetu kanalera!
Goiener Elkarte bidez Nafarroa eta Arabako mega-proiektuak eolikoen aurkako manifestuak babestu ditugu. Eredu energetiko banatu, jasangarri eta parte-hartzaile baten apustua da gurea.
Eguraldi ona iristearekin batera, Goiener Dendan termo-botila dotoreak ere jarri ditugu salgai. Sartu eta bilatu zure gustoko zerbait gure dendan: sudadera, kamiseta, «Energiak» monografikoa, katiluak, poltsak…
Amaitzeko, #Klik animazioko web seriea gomendatu nahi dizuegu, alternatiba sozioekonomikoak mintzagai dituena, eta bereziki, nola ez, energiaren ingurukoa.
Jaso agur bat.
