Oporraldian energiaz bete ostean, gogotsu ekin diogu goienertarrok irailari. Irrikaz gaude ikasturte berri eta berriztagarri honek ekarriko dizkigun erronkei heltzeko! Zu ere berdin izango zaren esperantzaz, hemen duzu udak utzitako albisteen laburpena:
Berezia izan da aurtengo uda, biziki arrakastatsua izan baita Udanbizi, Goienerrek antolatutako txirrindulari bira berriztagarria. 5 egunez eragin diegu pedalei eta ezagutu ditugu Nafarroan barrena energia-proiektu herritar interesgarri askoak; eta, nola ez, ospatu dugu elkartu izana bera ere! Eskerrik asko parte hartu duzuen guztioi!
Irailarekin batera, emaitza zinez argigarriak utzi dizkigu kooperatibako bazkideen artean egindako azken galdetegi erraldoiak. WHY proiektu europarreko kideekin elkarlanean, ikertu dugu Gasa Doitzeko Mekanismoak gure bazkideen artean zer ohitura aldaketa sortu dituen, eta datuek argi erakutsi dute honakoa: 2022ko maiatzaz geroztik, Goienerreko bazkideen gehiengoak (%93) neurriak hartu ditu bere kontsumoa ordu merkeenetara egokitzeko eta prest legoke berriztagarrietan inbertsioak egiteko. Ezin harroago gaude zuetaz!
Lan-urtea hasi orduko, han eta hemen hitzaldiak ematen ibiliko gara: Hernanin, Amurrion, Ultzamaldean, Basaburuan… Eta hau hasiera baino ez da! Datozen hilabeteetan izango ditugun ekitaldi guztien berri izateko, bisita ezazu Goienerren agenda; edo, nahiago baduzu, harpidetu zaitez gure Telegram kanalera.
Gogoan izan, bestalde, ikasturte berriarekin batera arretarako ordutegi berria daukagula, bazkideoi zerbitzu hobea eskaintzeko helburuz. Hauxe da gure ordutegi berria, bai arreta presentzialerako, baita telefonikorako ere:
Edonola ere, arreta ordutegitik kanpo gurekin harremanetan jarri nahi izanez gero, mezu bat bidali diezagukezu kontratuak@goiener.com helbidera. Horretaz gain, hainbat kudeaketa zuzenean egin ditzakezu gure web orrian edo “Nire Gunea” atalean.
Hilabete barru itzuliko da GoienerBerri, berri berriztagarri gehiagorekin.
Bitartean, zaindu.
