Kaixo goienerkide,
Hilero moduan, kooperatibaren inguruko albiste garrantzitsuenen berri ematera gatozkizu, zure interesekoak izango direlakoan.
Ondotxo dakizu Goiener kooperatiban ahalegin betean dihardugula zuk gugan jarritako konfiantzari erantzuteko lanetan. Horregatik jaitsi ditugu energiaren aldikako tarifen prezioak apirilean. Hemen kontsultatu ditzakezu prezio berriak.
Gure proiektuan ezinbestekoa da parte hartzea sustatu eta bazkideen hitza kontuan hartzea. Horren adibide da duela gutxi Irurtzunen egin dugun Nafarkoop kooperatibako bazkideen 2024ko Ohiko Batzar Orokorra. Ilusioz aurkeztu genituen ekitaldi berrirako gure asmoak eta proiektuak, eta bazkideek gehiengo osoz onartu zituzten Kontseilu Errektoreak Batzarrari egindako proposamen guztiak. Esteka honetan kontsultatu ditzakezu emaitzak.
Horri lotuta, finkatua dugu Goienerreko aurtengo Batzar Orokorrerako hitzordua ere. Ekainaren 8an izango da, Lazkaoko Biziola Fabrikan. Gorde eguna zure agendan eta zatoz; zure zain izango gara!
— Ekainaren 8an, Goiener S.Coop.-eko Batzar Orokorra.
Gorde eguna:
iCalendar – Google Calendar – Outlook 365 – Outlook Live
Bestalde, aitortu behar dugu oraindik ez zaigula pasa 23. Korrikaren ondorengo bestondoa. Dakizunez, euskararen aldeko ekimenaren babesle izan gara aurten ere, eta une ahaztezin bezain hunkigarriak bizi izan ditugu Goiener kilometroetan. Harro gaude zutaz, bazkide, eta eskerrik asko Korrika babesten laguntzeagatik! Irudirik onenen bilduma ikusi nahi duzu?
Hain justu ere, Korrikaren babesean ospatu dugu aurtengo Goienerreko Bazkideon Eguna! Giro ederrean elkartu ginen Iruñerrian, eta Korrikan parte hartuz borobildu genuen egitarau zoragarria. Datorren urtean gehiago!
Dena ez da festa, eta Europako proiektuekin, esaterako, lanean gabiltza buru-belarri. ACCE da horietako bat, energia komunitateen proiektuetarako finantziazioa erraztea helburu duena. Proiektua hobeto ezagutu nahi baduzu, entzun Hala Bedi irratian egin ziguten elkarrizketa.
Eta lanaz ari garela, inoiz ez dugu nahikoa eskertuko gurean boluntarioek egin izan duten eta egiten jarraitzen duten lana. Gure izaeraren muina eta mamia dira. Ikusi Olatz boluntarioari egindako elkarrizketa laburra. Zu ere parte hartzeko prest?
Gure aldetik besterik ez. Datorren hilean itzuliko da GoienerBerri.
Zaindu.
