2024ko azaroan Bakun (Azerbaijan) egin zen Klima Aldaketari buruzko Nazio Batuen Konferentziaren balorazioa egin du Erika Martinez Lizarraga Goiener kooperatibako lehendakariak, Euskadi Irratiko Ekosfera saioan.
Jatorrizko audioa: Ekosfera
2025eko urtarriletik aurrerako arau- eta zerga-aldaketak
Urtero bezala, abenduan aldaketa fiskal eta arautzaile berriak onartu dira sektore elektrikoan 2025erako.
Zein aldaketa onartu dira?
Honakoak dira 2025ean indarrean sartuko diren eta zure argindar fakturari zuzenean eragingo dioten erregulazio-aldaketak:
— Argindarra garraiatzeko eta banatzeko sareetara sartzeko ordainsariak [1]: Bidesariek gora egin dute P1 (Punta) denbora tartean, eta murriztu egin dira gainerako aldietan.
— Sistema elektrikoaren karguak [2]: % 32,83 igo dira aurreko prezioekiko aldean.
— Sistemako Operadorearen Ordainsaria [3]: % 3,69 jeitsi da kontsumitutako energiaren egungo prezioarekiko.
— Merkatuko Operadorearen Ordainsaria [2]: Prezioa bere horretan mantenduko da.
— Kontsumitzaileek bonu soziala finantzatzea [2]: Hornidura-puntu bakoitzeko egungo kostuaren bikoitza baino pixka bat gehiago handitzen da.
— Balio Erantsiaren gaineko Zerga (BEZ) [4]: 2024/12/31n BEZa murrizteari utziko zaio, argindarrak handizkako merkatuan duen hileko batez besteko prezioaren arabera. BEZa % 21eko ohiko zerga-tasara itzuliko da.
Amaitzeko, beste aldaketa hauek onartu dira, epe labur edo ertainean argindarraren merkatuko prezioari eta/edo fakturari zeharka eragin diezaioketenak:
—Kontsumitzaileentzako bonu soziala [5]: Bonu sozialaren deskontuak eta hornidura-bermea 2025/12/31ra arte luzatuko dira.
— Ekoizleek bonu soziala finantzatzea [2]: Aurreko balioarekiko % 81,14 igo da (ekoizleek beren energiaren merkatuko salmenta-prezioan sartuko dute kostu hori).
— Energia Elektrikoaren Ekoizpenaren Balioaren gaineko Zerga[4]: 2024ko hirugarren hiruhilekotik aurrera % 7ko zerga-tasara itzuli da (ekoizleek beren energia merkatuan saltzeko prezioan sartuko dute kostu hori).
Nola eragingo dizu?
Jarraian zehaztu dizugu aldaketa erregulatzaile horiek zer eragin izango duten kontsumitzaile baten fakturan:
• 15 € gehiago urteko, 3,7kW-eko potentzia kontratatua eta 1.700 kWh-ko urteko kontsumoa dituen etxebizitza batentzat.
• 62 € gehiago urteko, 10 kW-eko potentzia kontratatua eta urteko 8.000 kWh-ko kontsumoa dituen negozio edo establezimendu txiki batentzat.
• 90 € gehiago urteko, 15kW eta 22kW bitarteko potentzia kontratatua eta 16.000 kWh-ko urteko kontsumoa dituen enpresa txiki-ertain batentzat.
Ohiko moduan, gure webgunean dituzu Goiener tarifen prezioak xehetasunez argitaratuta.
[1] Ebazpena, 2024ko abenduaren 4koa, Merkatuen eta Lehiaren Batzorde Nazionalarena, 2025eko urtarrilaren 1etik aurrera aplikatzekoak diren argindarraren garraio- eta banaketa-sareetarako sarbide-ordainsarien balioak ezartzen dituena.
[2] TED/1487/2024 Agindua, abenduaren 26koa, sistema elektrikoko karguen prezioak ezarri eta 2025eko ekitaldirako sistema elektrikoaren kostu arautuak ezartzen dituena eta 2025eko Sektore Elektrikoari buruzko abenduaren 26ko 24/2013 Legearen 52.4.j) eta 52.4.k) artikuluetan aipatzen diren kontsumitzaileen bonu sozialari eta argindar-horniduraren kostuari dagokienez finantzatu beharreko kopuruen banaketa onartzen duena.
[3] Ebazpena, 2024ko abenduaren 12koa, Merkatuen eta Lehiaren Batzorde Nazionalarena, 2025erako sistema elektrikoaren operadorearen ordainsariaren zenbatekoa eta hura finantzatzeko eragileei jasanarazi beharreko prezioak ezartzen dituena.
[4] 8/2023 Errege Lege Dekretua, abenduaren 27koa, Ukrainako eta Ekialde Hurbileko gatazkek eragindako ondorio ekonomiko eta sozialei aurre egiteko eta lehortearen ondorioak arintzeko neurriak hartzen dituena.
[5] 9/2024 Errege Lege Dekretua, abenduaren 23koa, ekonomiaren, zergen, garraioaren eta Gizarte Segurantzaren arloetan premiazko neurriak hartu eta sektore zaurgarrienak kaltetzen dituen egoerei aurre egiteko zenbait neurri luzatzen dituena.
Euskadi Irratia: Balkoietako eguzki-plakak, laster gurean?
2025erako joerei begira jarri dira Euskadi Irratiko Baipasa magazinean. Gurera heldu daitekeen joera horietako bat izan daiteke balkoietan jartzeko eguzki-plaka malguena. Dagoeneko, milioi eta erdi alemaniarrek jarri omen dituzte beren pisuetako balkoietan. Alazne Arruti Goiener kooperatibako teknikariak argitu du gizartean gero eta interes handiagoa sumatzen dela, eta ez litzatekeela harritzekoa laster gurean ikustea.
Jatorrizko audioa: Euskadi Irratia
Ekarri Goienerrera zure lagunen 5 kontratu adina!
Goienerren abal-sistema zaharra alde batera utzi dugu eta Goienerreko anfitrioi izateko aukera eman nahi dizugu, zure konfiantzazko pertsonak gonbidatuz beraien kontratua kooperatibara ekartzera. Gaurtik aurrera, zure izenean ez dauden 5 kontratu-lotu ekarri ahal izango dituzu gehienez.
Orain arte ez genuen aukera gehiegi eskaintzen, eta badakigu asko aldaketaren zain zeundetela. Bada, iritsi da eguna. Seguru inoiz pentsatu duzula zure ingurukoak ere pozik egongo liratekeela kontratua Goienerrera ekarrita edo dagoeneko bertan leudekeela kooperatibako kide izateko derrigortasunagatik ez balitz. Baliteke urratsik eman ez izana proiektua sakonki ezagutzen ez dutelako, kooperatiba-ereduagatik, hasierako ekarpen hori muga izatea…
Iritsi da unea. Anfitrioi izatera gonbidatzen zaitugu eta Goiener handitzen laguntzera, beti ere Goienerren ezaugarri ditugun gertutasunari eta balioei eutsiz. Azken finean, kooperatibara zure etxera gonbidatuko zenituzkeen lagunak ekartzea nahiko genuke. Hori da baldintza bakarra, zure irizpidean sinistuta baikaude.
Kontsumismoz beteriko garaiak gainean ditugun honetan, zer egokiagorik “Goiener oparitzea” baino? Aprobetxatu aukera zuk nahi duzunari “Goiener oparitzeko”. Deskargatu eta inprimatu oparitarako zure txartela*:
*Nahiago baduzu, oparitzeko txartelaren gaztelerazko bertsioa ere badugu.
Oraindik ez duzu ondo ulertu aldaketa? Bideo labur honetan azalduko dizugu:
Euskadi Saria jaso du Goiener kooperatibak energiaren kontsumo arduratsua sustatzeagatik
Kooperatibako ordezkariek Kontsumobide Kontsumoaren Euskal Institutuko zuzendariaren eskutik jaso zuten saria
Iragan abenduaren 11n Bizkaia Aretoan ospatu zen galan, Euskadi Saria jaso zuen Goiener kooperatibak, kontsumoaren kategorian, energiaren kontsumo arduratsuaren alde egiten duen lanarengatik.
Hala, aitortza egin zaio 2012an energia erabat berriztagarria merkaturatzeko asmorarekin sortu zuten kooperatiba herritarrari, eta saritu zaio energiaren alorrean egin duen sentsibilizazio- eta prestakuntza-lan guztia.
Erika Martinez, Goienerreko lehendakariak, eta Mikel Libano, kontseilu errektoreko kideak jaso zuten saria Tontxu Rodriguez Kontsumobideko zuzendariaren eskutik.
“Gure helburua, energia berriztagarrietan oinarritutako trantsizio energetiko demokratiko eta parte-hartzaile baten alde lan egitea da, energiaren erabilera arduratsua sustatuz. Hori lortzeko ezinbestekoa da gizartea informatzea” aitortu zuen Erika Martinezek.
Libanok, aldiz, kooperatibako bazkideei eskainitako aholkularitza-zerbitzua, tailerrak eta prestakuntza azpimarratu zituen kontzientziazio-lanaren funtsezko zutabe gisa. “Energia-kultura berritu baterantz egin nahi dugu, lema hau ipar hartuta: energiarik onena kontsumitzen ez den hura da, eta kontsumitu behar baduzu, izan dadila energia berriztagarria eta eko-sozialki justua den eredu batetik datorrena”.
Biek ala biek ere, Goiener kooperatibako bazkide guztiei eskaini zien saria.
ACCE proiektua Bukaresten bildu da
Aste honetan, ACCE proiektu europarreko bazkideen bilera izan dugu Bukaresten (Errumania), Goiener tartean zela. Eztabaida arrakastatsua izan da, ideia inspiratzaile eta ikuspegi interesgarriekin.
ACCE proiektuaren helburua energia-komunitateentzako finantzaketa-tresna berritzaileak aztertzea, garatzea eta eskalatzea da.
Bileraren ondoren, Bukaresteko historia eta arkitektura ikusgarria ezagutuz amaitu genuen ekitaldia. Irudietan ikus daitekeenez, eguna oso berezia izan zen. Laster gehiago!
