GoienerBerri

Kaixo goienerkide,

Azken hilabetea oparoa izan da Goiener kooperatiban. Albisterik garrantzitsuenak irakurri nahi?

Martxoa, bereziki, Korrikaren hilabetea izan da. Aurtengo edizioak esanahi berezia hartu du gure kooperatiban, aurreko ekitaldietan bezala, Goiener Korrikako petoaren babesle ofizialetako bat izan baita. Ilusio ikaragarriz atera gara errepidera, «EUSKARA GARA» lemapean, gure hizkuntzaren alde egiten den ekimenik jendetsuenean parte hartzera.

Ospatzeaz ari garela, duela gutxi egin dugu aurtengo lehen Batzar Orokorra, Nafarkoop kooperatibakoa. Goienerren, sorkuntza arloari dagokionez, 2025 ekitaldian egindako guztia azaldu genuen, eta baita aurrera begira egin-asmo duguna ere. Bazkideek proposatutako puntu guztiak onartu zituzten. Hemen duzue egunaren bideo-laburpena:

Egunotan, bazkideoi deialdi berezi bat eginez, zure bizilagunen komunitatearen argindar kontratua Goienerrera ekartzeko kanpaina berri bati ekin diogu. Dagoeneko 300 etxebizita-komunitatek baino gehiagok dute argindar kontratua Goienerrekin, eta zurea izan liteke hurrengoa, dirua aurreztuz, gainera. Egungo faktura eskatu eta guri bidali, ez duzu besterik egin behar. Gu arduratuko gara eskaintza on bat egiteaz!

Lehen aipatutakoez gain, baditugu ospatzeko motibo on gehiago ere. Izan ere, duela gutxi saritu gaituzte Madrilen, Funteso Fundazioak antolaturiko II. Teknologia Soziala lehiaketan, “Energia herritarra eta Kooperatibismoa” mailan.

Goienerren eta bazkide guztien izenean, Erika Martinez Lizarraga lehendakariak eta Maria Arretxe Agirre koordinatzaile nagusiak jaso zuten saria.

Ospakizunetarako tarte handirik gabe, ordea, nazioarteko testuinguruak adi eta atezuan egotera behartzen gaitu, Ekialde Hurbileko krisiaren eraginez, merkatu elektrikoa etengabeko tentsio egoeran baitago. Inoiz baino gehiago, gardentasuna eta informazio eguneratua zor dizkizuegu, eta horren emaitza da berriki argitaratu dugun artikulua, krisiak gure fakturan zer eragin duen azaltzen duguna.

Etxean, energia komunitateei sortu eta lehen pausoak ematen laguntzeko lanekin jarraitzen dugu, esaterako, Igeldon, Astigarragan eta Orion. Zalantzarik gabe, argitxoz betetzen jarraitzen du gure energia komunitateen mapak! 

Energia modu kolektiboan partekatzeko Auzoargi ekimena pixkanaka ari da aurrera egiten. Gertuko energia erraz kontsumitzeko modu honen lehen instalazioa jadanik egina dugu Lazkaon, eta legeztatze prozesuan dago. Bestalde, Eibar eta Elgoibarko hurrengo instalazioak aurkeztu genituen hitzaldian oso erantzun ona jaso genuen.

Eta amaitzeko, gomendio berezi bat. Tartetxo bat hartu eta “Argia berreskuratu. Energia-sarbiderako borroka kolektiboak” izeneko dokumentala ikustea aholkatzen dizugu. Ez zara damutuko!

Gure aldetik besterik ez. Datorren hilabetera arte. 

Zaindu.

Kaixo goienerkide,

Urtez urte kooperatiba hazten ari da, eta erronkak biderkatzen doazenez, uneotan martxan daukagu 5 lanpostu osatzeko deialdia eta hautaketa prozesua. Datorren asteartean (hilak 24) amaituko da hautagaitzak bidaltzeko epea. Interesatuta zaude? Bidali iezaguzu zurea edo lagundu zure inguruan deialdia zabaltzen. 

Horretaz gain, jakizu aurtengo Batzar Orokorrek badutela eguna. Gorde itzazu datak agendan, zu ere kooperatibako kide zarenez gero, ezinbestekoak baititugu zure hitza eta erabakiak!

Goiener Taldean garrantzia handia ematen diogu bazkide zein langileak maiz elkartu, kooperatibako erabakietan parte-hartzea sustatu eta etengabeko formazioari. Orain hurrena, Azpeitian elkartu ginen, langileentzako formakuntza saioan. Bideoa ikusi nahi?

Bestalde, gogoan izango duzu duela hilabete batzuk Batzar Informatiboak egin genituela Hego Euskal Herriko 4 hiriburuetan, kooperatiban zertan dihardugun gardentasunez azaltzeko. Datorren asteazkenean (otsailak 25) Arrasateren txanda izango da. Zure zain izango gaituzu!

Era berean, gogorarazi nahi dizugu, 2023tik hona ibilgailu %100 elektriko bat erosi baduzu, 1.000 eurora arteko pizgarri ekonomiko bat jaso zenezakeela, Energia Aurrezteko Ziurtagirien (EAZ) bidez. 

Informazio gehiago jasotzeko, bisita ezazu prestatu dugun orri hau; aldiz, pizgarririk ba ote dagokizun jakiteko, bete ezazu ondoko galdetegia.

Amaitu aurretik, urteurren berezi bat ospatu nahi dugu zurekin, urte betea baita, “Goazen, lagunok” egitasmoarekin bat eginez, X sare sozialean argitaratzeri utzi geniola. Geroztik, errespetua eta balio hobeak lehenesten dituzten espazio digitaletan gabiltza; Mastodonen edo Peertuben, esaterako. Nahi izanez gero, jarraitu gaitzazu!

Gure aldetik besterik ez. Datorren hilabetera arte. 

Zaindu.

Urte Berri on goienerkide,

Aginduari zor, 2026arekin batera, bueltan gatoz albisterik aipagarrienak bilduta. Urte ederra izan zen iazkoa: ekarpen leihoak, kanpaina bereziak, lankidetza hitzarmenak… Sorkuntza proiektuetan aurrerapauso oso sendoa eman dugu eta ez dugu urruti 20.000 bazkideko langa. Zuri esker gainditu dezakegu, lagundu iezaguzu Goiener hazten eta zabaltzen!

Urtarrila albiste onekin hasi dugu. Lehenik eta behin, prezioak jaitsi ditugu urteko lehen hiruhilekoan. Nahi izanez gero, lotura honetan kontsultatu ditzakezu tarifa berriak. Bestalde, duela gutxi ibilgailu %100 elektriko bat erosi baduzu, berri ezin hobeak ditugu zuretzat.

Izan ere, konbustiozko ibilgailu zaharra erretiratu eta %100 elektrikoa den beste baten jabe egin bazara, 1.000 eurora arteko pizgarri ekonomiko bat jaso dezakezu Energia Aurrezteko Ziurtagirien (EAZ) bidez. Informazio gehiago nahi baduzu, jo ezazu prestatu dugun orri honetara; aldiz, pizgarririk ba ote dagokizun jakiteko, ondorengo galdetegia bete zenezake.

Bide batez, bihotzez eskerrak eman nahi dizkizuegu duela gutxi bidalitako inkesta betetzeko tartea hartu duzuen bazkide guztioi. 1.200 erantzun baino gehiago jaso ditugu! Gure web orrian jaso ditugu inkestaren emaitza eta ondorio nagusiak, baina aurerrapen modura, datuek ez diote gezurrik: batez beste, 8,92 puntuko balorazioa eman diozue gure lanari (iaz baino 3 dezima gehiago).

Partehartzaile guztien artean bertako produktuz osatutako saski eder bat zozkatu dugu eta Beñat Urteaga Larrañaga bazkide donostiarra izan da irabazlea. Zorionak, Beñat!

Gu geu ere bestondo gozoarekin gabiltza, festa giroan eta bazkidez inguratuta inauguratu baitugu Iruñeko bulego berria. Irekiera berezia da, Alde Zaharreko ofizina berri hau aurrerantzean Izarkom telekomunikazo kooperatibarekin elkarbanatuko baitugu, abian dugun lankidetza hitzarmenaren baitan.

Hain justu ere, Izarkom eta beste eragile gehiagorekin batera, emakumezkoen euskal pilota sustatzeko akordiora batu gara. Horri esker, aurten ere Goienerrek babestuko du Emakumezkoen Gipuzkoako Lau t’erdiko Txapelketa.

Bistakoa da bidaide onen konpainian eta sareen indarrean sinesten dugula. REAS Euskadiko kide ere bagara eta, aurten ere, Euskadiko Ekonomia Sozial eta Solidarioko (ESS) ongizate-maila erakutsi dugu, Auditoria Sozialean. Nola ote dabil Goiener berdintasun kontuetan? Nola banatzen ditu irabaziak? Bermatzen al du lan duina? Kontsulta itzazu gardentasun ariketa honen emaitzak. Spoiler: sasoian gaude!

Horregatik, ez dugu aitzakiarik euskararen alde errepidera ateratzeko! Badator Korrikaren 24. edizioa, eta, aurten ere, Goiener Taldea izango da petoaren babesle ofizialetako bat. 

Martxoaren 19tik 29ra, gure kooperatibak ohorezko lekua izango du korrikalari euskaltzaleen petoetan. Bide batez, adi ibili, laster iragarriko baititugu lekukoa hartzeko gure hitzordu bereziak. Errepidean elkartuko gara!

Gure aldetik besterik ez. Osasunez ekin urteari, eta datorren hilabetera arte. 

Zaindu.

Kaixo goienerkide,

Hemen duzu Goienerberri, urriko albisterik garrantzitsuenak berekin hartuta. Egiari zor, oso pozik gaude, ez baitzizkigu ospakizunetarako motiboak falta. Lorpenak zerrendatzen hasi aurretik, ordea, gogoan izan iaz bezala Batzar Informatiboak antolatu ditugula. Aukeratu gertuen duzun hitzordua eta zatoz! 

Atsegin handiz elkartuko gara zuekin, energiaren sektoreari eta kooperatibari buruzko edozein zalantza argitzeko.

Zergatik gauden pozik? Ba, alde batetik, duela gutxi gainditu dugu 19.000 bazkideko langa kooperatiban! Beteranoenei eskerrik asko; iritsi berriei ongi etorri!

Bestalde, sorkuntzaren alorrak eman digu poz galanta. Pasa den astean ireki genuen proiektu berrietan inbertsio kolektiboak egiteko ekarpen-leihoa… eta egun gutxiren buruan lortu dugu beharrezko kopuruaren % 100! Eskerrik asko bazkide guztiei, herritarren jabetzako sorkuntza proiektu berriztagarriak martxan jartzen laguntzeagatik! Eta emateko gogoz geratu zaretenei, ez kezkatu, laster irekiko ditugu leiho berriak. 

Ahalegin berezia egiten ari gara gure bazkideengandik inoiz baino gertuago egoteko. Horren adibide da Goienerren bulego ibiltaria Lekeitiora iritsi izana. Harrera beroa jaso genuen! Eskerrik asko energiaren inguruko zalantzak argitzera hurbildu zinen Lea-Artibaiko herritar guztiei.

Ilusioz dihardugu berriztagarriak sustatu, kontsumoa murriztu eta herritarrak ahalduntzeko lanetan. Horregatik, han eta hemengo hainbat herritar-proiektutan murgildurik dago Goiener. Batzuk aipatzearren, Debagoienan energia trantsizioaren norabidea adosteko Argitzen prozesuan edo Mañeruibarreko herritarrek eta eragileek abian jarri duten Ordeas Valdemañeru-n, ibarreko erronka nagusiei aurre egiteko politikak sortzeko estrategian. 

Azken hilabete honetan, ordea, gure lana ez da berriztagarrien alorrera mugatu, eta Goienerreko langileok bat egin dugu Israelgo gobernua Palestinan egiten ari den genozidioa salatzeko lanuztearekin.

Amaitu aurretik, gogorarazi nahi dizugu hemeroteka atalean kontsulta ditzakezula hedabidetan egin berri dizkiguten elkarrizketa edo erreportaje interesgarri askoak, eta kooperatibaren inguruko informazio guztia daukazula Goienerren telegram kanalean. 

Gure aldetik besterik ez; hurrengo hilabetean itzuliko da GoienerBerri, albiste gehiagorekin.

Bitartean, zaindu.

Hemen da udaosteko lehen Goienerberria, albiste freskoz bete-betea.

Ondo dakizunez, energia berriztagarria sortzea da Goienerren izateko arrazoietako bat. Bazkideen laguntzarekin, proiektu berriztagarriak egiteko inbertsio kolektiboak sustatzen ditugu, tokian tokikoak eta herritarren jabetzakoak. Laster emango dizugu informazio gehiago baina erne ibili, leiho berriak irekitzekotan baikara. 

Abian duguna Goiener tarifa indexatuen kanpaina da. Eskaintzen hasi garen tarifa mota berri hau orduro aldatzen da, merkatuko argindarraren prezioaren arabera, eta zenbait kasutan, finkoa baino merkeagoa izan liteke. Ondoko bideoan duzu informazio guztia; nahiago baduzu, baita orri honetan ere.

Kooperatiban etengabe dihardugu bazkideei kalitatezko zerbitzua eta informazio gardena emateko lanean. Aurrez aurreko arreta-zerbitzua hobetzeko helburuz, jakinarazi nahi dizugu Iruñean bulegoz aldatu dugula. Kale Berriko 10. zenbakian aurkituko gaituzue; konpainia ederrean, gainera… Laster irekiera-festarako gonbitea eta albiste gehiago!

Arreta zerbitzuak aipatuta, gure webgunean txat berria estreinatu dugu, bazkideok aukera izan dezazuen arretarako ordezkariekin denbora errealean harremanetan jartzeko, beti ere bulego ordutegian. 

Eta beharrezkoa bada, gu inguratuko gara zuengana! Esate baterako, faktura energetikoen inguruko aholkularitza zerbitzua eskaintzen ari gara Uribe Kostan. Herritarrak ahalduntzen dihardugu eta, zenbait kasutan, baita fakturan aurrezteko laguntza ematen ere. Euskal Telebistako kazetarien arreta ere piztu du ekimenak:

Era berean, laster Lekeitiora eramango dugu Goienerren bulego ibiltaria. Herritarrengandik gertuago egoteko asmoz, urriaren 8an eta 9an energiaren inguruko zalantzak argitzeko zerbitzua eskainiko diegu Lea-Artibaiko herritarrei. 

Agurtu aurretik, kontuan izan ohiko arreta-ordutegira itzuli garela; bai bulegoetan, baita telefono bidez ere.

Eta amaitzeko, zer hoberik Udanbizi ekimenaren irudi onenak ikustea baino? Aurtengo udan, Goiener Elkarteko boluntarioak Lapurdi, Nafarroa Beherea eta Nafarroa Garaian barrena ibili dira, proiektu eraldatzaileak bisitatzen. Gozatu!

Gure aldetik besterik ez; hurrengo hilabetean itzuliko da GoienerBerri, albiste gehiagorekin.

Kaixo goienerkide,

Ikasturteari merezi duen amaiera ematera dator ekaineko Goienerberria, albistez bete-betea. Dakizunez, Gasteizen egin dugu Goiener S.Coopen aurtengo Batzar Orokorra, eta biak batera esan nahi dizkizugu: eskerrik asko eta zorionak! Goienerren gora egiten jarraitzen dugu bazkide eta kontratu kopuruetan, eta baita merkaturatutako energian ere. Bejondeigula!

Proposatutako puntu guztiak onartzeaz gain —tartean gure etorkizuneko norabidea markatuko duen Plan Estrategikoa (irakurri hemen)—, aurtengo batzarra une hunkigarriz eta sorpresaz beterik etorri da. Izan ere, koordinatzaile orokor berria daukagu: Maria Arretxe Agirre nafarra! Erreleboa emango dio 12 urtez karguan izan den Santi Ochoa de Eriberi. Langile, bazkide eta boluntario guztien izenean, eskerrik asko Santi!

Badugu ospatzeko motibo gehiago, Goiener Rescoop.eu, Europako Energia Komunitateen Federazioko Kontseilu Errektoreko kide izango baita. Krakoviako batzarrean mamitu den hau, urte askotako lanaren emaitza da, jakintza pilatu eta gure ahotsa Europan entzunarazteko aukera emango diguna.

Tamalez, dagoeneko bi hilabete igaro diren arren, ez dira apirileko itzalaldiaren ondorioak erabat apaldu; alde batetik, Doitzeko Zerbitzuen prezioen gorakada eragin du; eta, bestetik, eragin zuzena izan du eguneko merkatuan argiaren prezioa minimo historikoetara jaisteko. Guretzat lehentasun bilakatu da bazkideak gaiaz garden informatzea, eta horregatik argitaratu dugu itzalaldiaren arrazoiak ikertu dituen txostenaren gaineko analisia sakona.

Itzalaldiaren aurrean ez gara besoak gurutzatuta geratu, eta “Itzali sistema, piztu alternatibak” manifestua ―eta izen bereko webgunea― aurkeztu dugu Izarkom telekomunikazio kooperatibarekin batera. Oihartzun handia izan du hedabideetan, eta dagoeneko 2.000 atxikimendu baino gehiago jaso ditu. Sinatu ezazu zuk ere, eta piztu alternatibak!

Lankidetzen atala amaitzeko, ezin aipatu gabe utzi aurten ere Euskaraldian parte hartu dugula, Debagoieneko energia trantsizioaren norabidea adosteko Argitzen prozesuan ere bai eta arrakastatsuak izan direla emakumezkoen Goiener Saria pilota txapelketako finalak!

Horrenbeste ekimenen artean, ez pentsa etxeko lanez ahaztu garenik! Zerbitzu onena eskaini asmoz, abian ditugu zenbait kanpaina berezi. Alde batetik, Goiener tarifa indexatu berriak eskaintzen hasi gara, eta, bestetik, Goienerreko anfitrioi izan zaitezke orain. Azken honi esker, zure bazkidetzarekin kooperatibara 5 argindar kontratu ekartzeko aukera daukazu. 

Horretaz gain, uztailaren 14an abiatuko da Udanbizi, bost eguneko txirrindulari bira berriztagarriena. Aurten ere, inguruko energia proiektu eraldatzaileak ezagutuko ditugu, Lapurdi, Nafarroa Beherea eta Nafarroa Garaian barrena.

Iritsi da uda eta plan ederrak egiteko garaia. Gogoan izan Goiener Sarean gure bazkideek eskainitako hainbat aukera aurkituko dituzula turismoa modu iraunkorrean eta ingurumena errespetatuz egiteko.

Horretaz gain, gogoan izan udan arreta ordutegi berezia eskainiko dugula. Hemen duzu uztailean eta abuztuan zehar.

Gure aldetik besterik ez; datorren ikasturtean itzuliko da GoienerBerri, albiste freskoz beteta. 

Uda ona pasa!