BECoop

Goienerren badakigu etxeko energia-kontsumo handiena etxea berotzeko izaten dela. Badakigu energia elektrikoa merkaturatzea besterik ez egiteak zaildu egiten duela berokuntzaren eskaria deskarbonizatzea, berokuntzarako energia gehienbat energia termiko berriztaezinean oinarritzen delako. Sektore horretan iturri berriztagarrien presentzia handitze aldera, Europa iparraldeko energia berriztagarrietan oinarritutako beste energia-kooperatiba batzuk (RESCoops) lanean hasi dira aztarna ekologiko txikiagoa duten berokuntza-aukerak eskaintzeko, adibidez bioerregaiak.

Proiektu honetan, Goienerrek CIRCEren euskarri teknikoarekin batera hartu du parte, energia-iturri berriztagarrien bidezko eta girotze-eskaintzarik gabeko RESCoop baten kasu pilotu gisa, eta zerbitzu hori bere energia-eskaintzen zorroan txertatu du. Horretarako, proiektuaren lehen hilabeteetan, alde interesdun guztiek parte hartzeko esparru bat eskaini dugu, topaketa, prestakuntza-saio eta inkesten bidez. Horrela, bioerregaiak energia-baliabide berriztagarri gisa erabiltzeak ekar ditzakeen kezka eta/edo oztopo nagusiak jaso ditugu.

Lankidetza horrek biomasa solidoaren (adibidez, pelleta) edo biometanoaren (nekazaritza-hondakinen, hondakin-uren lohien, etxeko zein industriako hondakin organikoen, eta abarren deskonposiziotik datozen gasak) bidez berokuntzako zerbitzu energetikoetan oinarritutako negozio-lerro berri baten oinarriak finka ditzake, berokuntza-sistema indibidualak nahiz komunitarioak hornitu ahal izateko, baita jatorri berriztagarriko gas bidez beroa eta hiri-gasa banatzeko sareak ere. Hartara, aukera deszentralizatu eta komunitarioak sustatzen dira, zein funtsezkoak baitira eredu bidezkoago eta ingurumena errespetatzen duen baterako trantsizioan. Erregai berriztagarri eta hurbileko bat (0 km) sustatzeak tokiko energia-mendekotasuna murriztuko du (gas naturalaren inportazioa gutxituko baita), bai eta berotegi-efektuko gasen emisioak ere. Gainera, beren izaera deszentralizatuaren eta eskualde-inbertsioen egituraren ondorioz, bioenergien instalazioek ekarpen erabakigarria egin diezaiokete landa-eremuen garapen iraungarriari, eta diru-sarrerak izateko aukera berriak eskain diezazkiekete nekazariei.

Deskarbonizazio-erronka honetan, bazkide kontsumitzaile guztien iritzia izan dugu; horretarako, inkestak egin ditugu, neurtu edo piztu nahian bioenergien ezarpen-mailari eta gaur egun eskura dauden berokuntza-sistema motei buruzko interesa, prozesuan hondakinen balioespen energetikoa egiteko aukerak, eta, oro har, kooperatibaren barruan energia-teknologia horri buruzko pertzepzioak. Interesa duten aldeei begira, jardunaldiak antolatu ditugu bazkideen artean zein kooperatibatik kanpo, eta harremanetan jarriko gara bioenergien balio-kateko eragileekin (adib.: biomasa bioerregai gisa balioztatzeko aukeren bila dauden pertsona zein erakundeak).

BeCoop proiektuari esker, tokian tokiko biomasaren erabilera potentzialari buruzko aholkularitza zerbitzua posible egin dugu, hainbat eskualdetan azterlanak eginez.