Iraupena: 2018/04/1-2023/03/31
Dirulaguntza-hitzarmenaren zenbaki identifikatzailea: 764042
Proiektuaren arduraduna Goienerren: Santi Ochoa de Eribe
Deskribapena eta helburuak
CHESTER proiektuak, bost urteko ikerketa zientifikoaren ondoren, frogatu du etorkizunerako energia berriztagarrien kudeaketarako sistema adimendun eta malgu baten balio teoriko eta esperimentala.
Azken bost urteotan, energia kudeatzeko sistema berritzaile bat garatu du CHESTER partzuergoak ―energia termiko konprimitua biltegiratzea― , edo, bestela esanda, CHEST ingelesezko sigletan, Carnot bateria-motarengatik. Sistema horrek hiru teknologia ezberdinen konbinazioa du oinarri: tenperatura altuko bero-ponpa, tenperatura altuko energia termikoaren biltegiratzea eta Rankine organikoaren zikloa.
Laburbilduz, erabili gabeko argindarra sobera geratzen denean, bero-ponpak bero bihurtzen du, eta energia termikoa metatzeko sistema batean biltegiratzen da elektrizitatea behar den arte. Behar denean, bero hori berriro elektrizitate bihurtzen da Rankine organikoaren zikloaren bidez. Energia kudeatzeko sistema adimenduna denez ―hainbat iturri elektriko eta termiko eraginkortasunez kudeatzeko gai―, CHEST sistema oso eraginkorra da, energia elektrikoa metatzeko sistema bat baino zerbait gehiago izan baitaiteke.
Sistema eraginkorra da argindar-iturri berriztagarrientzat, hala nola eoliko eta eguzki-energiarentzat, bai eta tenperatura baxuko hondar-bero eta eguzki-energia termikoarentzat ere. Gainera ―argindarraz gain― gaur egun 125 gradurainoko beroa eman dezake, esate baterako, industria-inguruneetarako edo hiri-berokuntzako sareetarako. Ezaugarri horiei guztiei esker da CHEST sistema industria-inguruneetarako etorkizun handiko teknologia; izan ere, soberan geratutako energia-iturriak ―argindar zein beroa― eskariaren arabera erabil daitezke gero, elektrizitate edo bero modura. CHESTER proiektuaren baitan, partzuergoak CHEST laborategiko prototipo bat garatu eta probatu du, bere klaseko lehena.
Hiru osagaien lehenengo probek erakutsi zuten bete zirela diseinu-helburuak eta prototipoak erabat funtzionalak direla. CHEST laborategiaren prototipo osoa martxan jartzeak, egindako probek eta azterketek frogatu dute kontzeptu horren bideragarritasuna eta potentziala. Bero-ponparako argindar-sarrera 10 kWel ingurukoa izan zen, eta Rankine organikoaren zikloak 9 kWel sortu zituen. Biltegiratze latente eta sentikorraren sistema konbinatuari esker, malgutasunez egokitu zen parametro operatibo aldakorretara. Horrela lortu ziren osagaiak eta sistema osoa garatzeko etorkizuneko hobekuntzei eta aukerei buruzko ezagutzak.
Arrakastaz abiarazi eta probatu da prototipo berritzaile hau, bere klaseko lehen CHEST sistemaren funtzionamendu egonkorra erakutsiz.
Maider Epelde CHESTER proiektuaren koordinatzaileak azpimarratu duenez, “gaur egun funtsezkoak dira CHESTERen emaitzak Europaren etorkizunerako energia berriztagarriak kudeatzeko sistema adimentsu eta malguak lortzeko“. Hala ere, oraindik ikerketa eta berrikuntza gehiago behar dira teknologia eskala errealean aplikatzeko.
Goienerren rola
Energia (elektrikoa) biltegiratzea erronka handia izan da –eta da– energia-sistementzat, oro har. Energia berriztagarri modernoen ezartze- eta hedatze-prozesu progresiboak erronka handiagoak dakarzkie biltegiratze-sistemei. Zer egin daiteke energia berriztagarri soberakina dagoenean, unean-unean kontsumitu ezin dena? CHESTER proiektuak bero-ponparen funtzionamendu-printzipioan oinarritutako soluzio teknologikoa garatu nahi du, baina tenperatura handietan erabilita (proiektu honen berrikuntza-eremua).
CHESTER proiektuak Ikerkuntza eta Garapen izaeratik asko badu ere, Goienerrek hainbat ikuspegi eta motibaziorekin dihardu bertan:
- Ekarpena erabileraren ezagutzaren aldetik: gizartearen onarpena energia berriztagarriekiko.
- Ekarpena, teknologia honek lekua izan dezakeen etorkizuneko aplikazio-eremuak
- Energia termiko eta elektrikoaren inguruan merkatu-, arau- eta teknologikoa-mekanismoen ulermena, baita biltegiratze-aukerena ere, mugitzen garen eremuan etorkizuneko aplikazioetan pentsatu ahal izateko.
- Ikaskuntza (lehen aldiz hartzen dugu parte halako tamainako proiektu europar batean), Europako beste entitate batzuekiko lankidetzari dagokionez, eta horrelako proiektuek eskatzen dituzten zereginei gaineko lankidetza eta ezagutza sustapena.
- Proiektuaren lider den TECNALIAK egin digun gonbidapenak hurbiltasuna eta segurtasuna ematen dizkigu, Europan hain exijentzia-maila handikoa den esparru batean lehen urratsa emateko orduan.
Garapen teknologikoari bide luzea geratzen zaio oraindik, laborategiko eskalako erakustaldi horretatik hasi eta GoiEnerrek praktikan jar lezakeen eskala errealeko produktu bat aurkeztu arte, baina lehen urratsak oparoak izan dira.
Proiektu honi buruz gehiago jakin edo informazioa jaso nahi baduzu, 2028ra arte gutxienez eskuragarri egongo den web orria bisitatu zenezake.
Proiektu honek Europar Batasunaren Horizonte 2020 ikerketa eta berrikuntzako programaren finantzaketa jaso du, 764042 zk.ko finantzaketa-akordioaren pean.
Proiektu guztiak:
